Winter-retreat: Geestelike dissiplines en die eise van die bediening

Die Spiritualiteit Netwerk (Bedieningsbegeleiding) bied van Maandag 22 tot Woensdag 24 Julie ’n retreat vir Vrystaatse leraars aan met die tema: Die waarde van geestelike dissiplines om die eise van die bediening te hanteer. Ds Barry van der Merwe, ervare retreatleier, is die aanbieder en die retreat word gehou by Moolmanshoek LDC in die Oos-Vrystaat.

Vir enige dominee wat ernstig is oor haar of sy roeping, wat lief is vir die Here en lief is vir die gemeente, is dit moeilik om die balans te vind tussen werk, huislike lewe, ontspanning en persoonlike geestelike groei. Geestelike dissiplines soos bv. lectio divina, joernaalskryf en refleksiegebed is onontbeerlik vir die nodige balans en om uitbranding te voorkom.

Dié retreat wil leraars graag voorstel aan en bewus maak van die waarde van geestelike dissiplines vir verdieping en groei in hul persoonlike geloofslewe.

Markus 6

31Hy sê toe vir hulle: “Kom julle saam na ‘n verlate plek en rus ‘n bietjie op julle eie.” Want daar was baie mense wat voortdurend gekom en gegaan het; hulle het selfs nie kans gekry om te eet nie.

Abba Antonius, een van die Christen-woestynvaders (251-356 nC):

“Hy wat in afsondering en stilte sit

het ontsnap van drie oorloë:

die oorlog van hoor

die oorlog van praat

en die oorlog van sien.

Dan bly daar net een stryd oor om te stry,

En dit is die geveg om jou eie hart.”

Ds. Barry van der Merwe het BA, BD, Nagraadse Diploma Teologie en BA Hons Semitiese Tale aan die Universiteit van Pretoria studeer. Hy was leraar in die gemeentes Pretoria-Faerie Glen, Empangeni, Universiteitsoord, Lynnwood en Letsitele. Daarna was hy vir byna tien jaar woonagtig op Origins Retreatsentrum van die Randburgse Mosaïek-gemeente om dit te bestuur en te help met retreats en geestelike begeleiding.

Hy besoek sedert 1998 gereeld die Sediba Mountain Retreat by Hartbeespoortdam vir meer blootstelling aan die persoonlike dissiplines van stilword en kontemplasie. Hy was vier keer op retreat by die Taizé ekumeniese gemeenskap in Frankryk, en hy en sy vrou Ina het onlangs vir drie weke gewoon en gewerk in die gereformeerde klooster Grandchamp in Switserland.

Hy het besoeke gebring aan die Karmelieteklooster in Nijmegen, waar prof Kees Waaijman, bekende skrywer oor spiritualiteit, gewoon en gewerk het, asook aan die Benediktynse klooster in Chevetogne in België, wat bekend is vir die sang van die monnike. Plaaslik het hy onder andere persoonlike retreats gedoen in die Anglikaanse klooster St Benedicts in Johannesburg en die Benediktynse klooster Subiaco noord van Polokwane.

Hy lei sedert die jaar 2000 retreats met persoonlike geestelike dissipline as fokus.