Ontmoeting met Heiliges: Bridgid van Kildare

Soos in ons vorige Vrypos-uitgawe oor die Ontmoeting met Heiliges-reeks genoem, het dr Lisel Joubert op Donderdag 11 April die tweede aflewering in dié reeks via zoom aangebied. Dr Joubert is verbonde aan die Departement Sistematiese Teologie en Ekklesiologie van die Fakulteit Teologie aan die Universiteit Stellenbosch.

Hierdie keer was die aanbieding oor Bridgid van Kildare wat van 452 tot 525 nC in Ierland geleef het en as een van dié land se beskermheiliges beskou word. Aangesien sy in die vroegste jare van die Christelike geloof geleef het, is daar baie min oor haar bekend, maar danksy enkele bronne tot ons beskikking kan ons as hedendaagse navolgers van Christus baie deur haar toegewyde Christelike lewenswyse geïnspireer word. Bridgid is veral bekend vir haar liefdadigheidswerk, kloosterstigting, en as ‘n beskermer van vroue en kinders. Sy het ‘n belangrike rol in die Ierse Christelike geskiedenis gespeel en het ‘n sterk invloed op die Ierse kultuur gehad.