Deur Andries Gous, DEGNOS
Liewe vriende van DEGNOS
God is werklik ’n Hoorder van gebed
Die afgelope twee weke het opnuut gewys hoe gebed, toerusting en gehoorsaamheid nuwe lewe in gemeentes en gemeenskappe kon laat ontkiem. Van die Wes-Caprivi tot Tsumkwe, Grootfontein en Omatako was daar rede tot dankbaarheid – én nuwe gebedsversoeke.
Daar was die afgelope twee weke ’n diep bewuswording dat God werklik ’n Hoorder van gebed is. Dinge het op merkwaardige maniere begin gebeur en die pad het al duideliker in die rigting van die Wes-Caprivi gewys.
Vir geruime tyd is daar reeds vertel van die herlewing – of dalk eerder die nuwe lewe – aan die oostekant van die Wes-Caprivi nadat Oupa Tokkelosh besluit het om Jesus se pad te volg.
Terselfdertyd was daar groot kommer oor die vier habitatte aan die westekant van die Wes-Caprivi, waar die kerk feitlik tot stilstand gekom het. Dit het herinner aan Esegiël se visioen van die vallei vol droë bene: ’n plek waar daar op die oog af min lewe oorgebly het.
Op Dije het ’n klein kerkie gestaan, maar die gemeentelewe daar was reeds vir ’n geruime tyd baie stil. Tog het daar juis hier nuwe tekens van hoop begin verskyn.
Hande en harte uit die VSA
Vriende van DEGNOS en Tennessee Valley Community Church in die VSA het die afgelope week Tsumkwe besoek. Hulle het saam met plaaslike gelowiges aan evangelisasie-uitreike deelgeneem en ook gehelp om ’n gemeenskapsgroentetuin by ds N!aici op Aasvoëlnes op die been te bring.
Hulle betrokkenheid en bereidwilligheid om prakties hand by te sit, is met groot dankbaarheid ontvang.
Saam in gebed
Die Luhebu-Noord-gemeente het ook op Omatako en Mangetti Duin saamgetrek vir ’n besondere biddag. Dit het deel gevorm van die nasionale biddag wat deur Namibië se staatspresident, me. Netumbo Nandi-Ndaitwah, uitgeroep is.
Dit was ’n geleentheid om as geloofsgemeenskap saam stil te word en Namibië, sy mense en gemeenskappe aan die Here op te dra.
Toerusting wat lewens verander
Dirk en Andries het intussen met die laaste opleidingsblok van die jaar begin. Die eerste groep studente het in Grootfontein opleiding ontvang in traumaberading, asook leierskap- en beplanningsvaardighede aan die hand van die boek Nehemia.
Persoonlike mentorskapgesprekke is ook met elke student gevoer om te hoor hoe hulle gedurende die opleiding gevorder en gegroei het.
Die uitwerking van dié toerusting was besonders. Dit het veel verder gestrek as bloot die aanleer van nuwe kennis. Daar was sigbare verandering in mense se lewens, hul gesinne, gemeenskappe en uiteindelik ook in die plaaslike kerk.
Dit het net een reaksie gevra: Halleluja! Prys die Here!
Goeie rentmeesterskap
Tracey het saam met die ouditeure aan DEGNOS se jaarlikse finansiële oudit gewerk. Die proses het deel gevorm van die organisasie se voortdurende strewe na goeie bestuur en volledige finansiële deursigtigheid.
Chetto Bybelskool
Heelwat werk het ook ingegaan in die finalisering van die projekvoorlegging vir die beoogde Multidoel-opleidingsentrum aan DEGNOS se Nederlandse vriende by Verre Naasten.
Die gebed rondom dié proses het eenvoudig gebly: dat die Here se wil sou geskied en dat die regte deure op die regte tyd sou oopgaan.
Omatako se winkel byna gereed
Die winkel op Omatako was teen die einde van die week feitlik voltooi en sou binnekort kon begin handel dryf. Die sonkragstelsel is reeds geïnstalleer, terwyl die bouspan met die oprigting van die tweeslaapkamer-wooneenheid voortgegaan het.
Ook op Mangetti Duin het die winkel bo verwagting goed gevaar. Teen die tempo waarteen dit ontwikkel het, het dit gelyk of die winkel maandeliks ’n betekenisvolle bydrae tot die versorging van die gemeente sou kon lewer.
Die winkel- en behuisingsprojekte het dieselfde groter doel gedien: om gemeentes te help om hul eie inkomste te genereer, groter finansiële selfstandigheid te bereik en terselfdertyd die finansiële las op plaaslike gemeenskappe te verlig.
Nuwe werkers vir die oes
Ook in Tsumkwe was daar rede tot dankbaarheid. Twee nuwe studenteleraars, Temi en Kamashe, is aangestel om vir die volgende jaar saam met die plaaslike leierskap te werk. Dit het deel gevorm van hul praktiese opleiding op pad na volwaardige bediening.
Frankie is ook as student-jeugwerker aangestel. Hy sou saam met broer Mishe werk as deel van sy eie ontwikkelingsplan en om die gemeente se jeugbediening verder te help ontwikkel.
In die Wes-Caprivi het daar nóg ’n betekenisvolle ontwikkeling gekom: Paulus Sikanduko is beroep om leiding aan die gemeente op Dije te gee. Hy moes daarna voor die Here onderskei of dit inderdaad die plek en bediening was waartoe God hom geroep het.
Juis op ’n plek waar die kerk kort tevore nog soos ’n vallei van droë bene gevoel het, het daar dus weer tekens van nuwe lewe begin verskyn.
’n Vol program van toerusting
Riana het intussen ’n internasionale konferensie oor vroue in bediening in Kaapstad bygewoon wat deur Verre Naasten gereël is.
Met haar terugkeer sou sy direk by ’n Amos Meerkat Skool-slypskool in Windhoek inskakel ter voorbereiding van die DEGNOS-Onderwyskonferensie. Dit het deel gevorm van ’n besonder vol program van drie weke, en daar is spesifiek vir haar gesondheid, energie en geestelike versterking gebid.
Die volgende groep studente het ook reeds vir Blok 6 se opleiding opgedaag, waar Dirk en Andries met die klaswerk sou voortgaan. Die gebed was dat dié studente nie net in kennis sou groei nie, maar geestelik gevorm en aangevuur sou word om dit wat hulle geleer het, prakties in hul gemeenskappe uit te leef.
Daar was rede om die Here te prys
Wanneer daar teruggekyk is na alles wat binne ’n kort tyd gebeur het – opleiding, nuwe bedieningswerkers, projekte wat voltooiing genader het, gemeentes wat na groter selfstandigheid beweeg het en nuwe hoop in die Wes-Caprivi – was daar ’n eenvoudige slotsom:
God is getrou.
Sy handewerk het telkens verwondering gebring, selfs op plekke waar dit aanvanklik gelyk het asof daar min lewe oorgebly het.
En daarom het die uitnodiging bly staan:
Prys die Here, almal wat asem het.
Prys sy heilige Naam!
DEGNOS-groete
| Foto’s is deur Andries Gous, DEGNOS, verskaf.
