Deur Andries Gous, DEGNOS
Liewe vriende van DEGNOS
DEGNOS se bediening getuig van God se trou te midde van uitdagings
Die week ná die viering van Paasfees was vir die DEGNOS-bediening ’n tyd waarin medewerkers en gemeentes opnuut herinner is dat ons ’n Voorspraak het wat volkome mens én volkome God is. Te midde van uitdagings, siekte, opleiding, uitreike en bediening in moeilike omstandighede, het die Here se trou en voorsienigheid telkens duidelik na vore gekom.
Gebed vir ds Regina
Een van die grootste bekommernisse die afgelope tyd was die gesondheid van ds Regina. Sy is na Windhoek oorgeplaas en later in die Sentrale Hospitaal opgeneem. Aanvanklik kon daar nie kontak met haar gemaak word nie, en die onsekerheid oor haar toestand het groot kommer veroorsaak. Tracey het later na Windhoek vertrek om haar persoonlik te besoek.
Dokters het bevestig dat ds Regina met kanker gediagnoseer is wat reeds ver versprei het. Daar was aanvanklik planne om haar terug na Grootfontein oor te plaas, maar verdere prosedures is later in Windhoek oorweeg. Medewerkers het getuig hoe Psalm 139 tydens besoeke saam met haar gebid is – ’n herinnering dat die Here elke tree van haar pad ken.
DEGNOS versoek gelowiges om steeds vir ds Regina en haar familie in gebed te dra.
Teologiese opleiding en toerusting
Teologiese opleiding het steeds ’n belangrike fokus van die bediening gebly. Die Namibiese kerk het voortgegaan om saam te worstel met sake rondom teologiese opleiding, lidmaatbemagtiging, herderskap en die rol van die ampte van lidmaat, diaken en ouderling. Daar is gevra dat gelowiges saam bid vir wysheid, nederigheid en ’n dienskneg-hart in die bediening van die Here se liggaam.
Groep 2 Blok 2 se studente het in Grootfontein saamgetrek vir opleiding, en medewerkers het vertel hoe studente van blok tot blok geestelik gegroei het. Die passie waarmee die Evangelie gedra word, het groot bemoediging gebring. Voorbereidings vir nuwe studente-opleidings het ook groot logistieke beplanning vereis – van boekdrukwerk tot kosreëlings en verblyf.
Intussen het ds Johannes Aucamp en sy span opleiding in Omega, Wes-Caprivi en later op Mangetti Duin aangebied. Daar is vertel dat die opleiding broodnodig en goed bygewoon was, terwyl gelowiges aangemoedig is om vir die toerusting van herders en geestelike leiers te bid.
Uitreike en evangelisasie
Verskeie uitreike het in hierdie tyd plaasgevind. Studente van die Namibian Evangelical Theological Seminary (NETS) het saam met medewerkers op Tsintsabis uitgereik waar hulle van huis tot huis die Evangelieboodskap gedeel het. Volgens terugvoer het sommige mense tydens die besoeke tot bekering gekom.
In die ooste van die Bwabwata-gebied het Broer Smith en sy span evangelisasie en opleiding in verskillende habitatte gedoen. Daar is ook vertel van die Windhoek-Wes-uitreikspan wat praktiese hulp, soos die bou van toilette en speelrame by ECD-skole, gaan lewer het. Hierdie betrokkenheid het opnuut beklemtoon dat elke lid van Christus se liggaam ’n belangrike rol speel.
Jeugbediening en TCE-opleiding
Jeugbediening het ook sterk aandag geniet. Verskeie jeugkampe is beplan en aangebied, met honderde kinders wat bereik sou word. Medewerkers het gevra vir gebed vir veilige reise, ontvanklike harte en krag vir almal wat by die voorbereiding en aanbieding betrokke was.
Die TCE-opleiding (Teaching Children Effectively), aangebied deur Child Evangelism Fellowship (CEF), het in Grootfontein afgeskop waar studente en medewerkers toegerus is om die Evangelie effektief aan kinders oor te dra.
Gemeenskappe dra mekaar in gebed
Die bediening het ook saamgestaan rondom moeilike persoonlike omstandighede. Gebed is gevra vir die vrou van ouderling G. Parata van Omatako-gemeente, wat ernstig met asma gesukkel het.
Daar is ook gebid vir die Parata-familie terwyl ’n hofsaak in Grootfontein plaasgevind het wat verband hou met ’n tragiese voorval twee jaar gelede. Gelowiges is versoek om vir al die partye betrokke te bid – insluitend die familie, getuies, polisie en regsgeleerdes – sodat geregtigheid en vrede sou seëvier.
Afsterwe van oom Reinhardt Friederich
Die DEGNOS-familie het ook stilgestaan by die afsterwe van oom Reinhardt Friederich, een van die stigters van die Wildevy-gemeente. Hy is onthou as iemand wat brûe tussen verskillende volke gebou het en ’n groot rol gespeel het in die bediening onder die Hai//om-mense.
Die roudiens en lewensviering het familie, vriende en medewerkers oor taal-, kleur- en kultuurgrense heen saamgebring om die vrug van die Evangelie in sy lewe te vier.
Vertroue in God se voorsienigheid
Te midde van finansiële druk en toenemende logistieke kostes, veral weens internasionale spanning en stygende brandstofpryse, het DEGNOS steeds vasgehou aan die waarheid van Romeine 8:28: “Alles werk ten goede mee.”
Daar is spesiaal gebid vir die armstes van die armes wat swaarkry weens hoër kos- en vervoerkoste, asook vir wysheid oor die bediening se toekomstige beplanning. Werkspermit-aansoeke vir verskeie medewerkers en families is ook ingedien, terwyl nuwe samewerkingsgeleenthede in die Zambezi-strook ontstaan het om opleiding en kerkbediening verder uit te brei.
“Die arbeid van gebed is die grootste geskenk”
DEGNOS het sy dank uitgespreek teenoor almal wat die bediening deurentyd in gebed ondersteun. Medewerkers het getuig dat hulle krag vind in die wete dat hulle nie alleen werk nie, maar dat ’n groot skare gelowiges saam met hulle bid en die bediening dra.
Soos een medewerker dit verwoord het: “Die arbeid van gebed is die grootste geskenk wat ons van u kan kry.”
DEGNOS-groete
| Foto’s is deur Andries Gous, DEGNOS, verskaf.
