Woodlandhills NG Gemeenskapskerk | Voltydse Leraar

Woodland Hills is ’n NG Gemeenskapskerk (WHNGGK) in Bloemfontein. Die gemeente is 14 jaar oud en het ongeveer 528 belydende, 223 dooplidmate en 33 vriende van die gemeente. Vriende van die gemeente is lidmate wat inskakel en bedien word, maar wat nie hul tradisionele lidmaatskap elders kanselleer nie.

WHNGGK is ’n voorstedelike gemeente wat hoofsaaklik die landgoed van Woodland Hills bedien, maar het ook heelwat lidmate buite die grense van die landgoed. Die gemeente wil ’n tuiste wees waar God se liefde tasbaar is en sodoende elkeen toerus en uitstuur. Ons gemeente bestaan uit alle ouderdomsgroepe, met ’n persentasie senior lidmate waarvan ’n deel in ’n “Lifestyle Village” binne die gemeentegrense woon.

Ons as Woodland Hills NG Gemeenskapskerk wil graag aansoeke van passievolle en energieke leraars ontvang. Deel van die visie van die kerkraad is om die bediening aan ons gesinne uit te bou met die oog op gemeentegroei. Die geskikte kandidaat moet ’n liefde vir God en ‘n liefde vir mense op alle ouderdomsvlakke hê en aan die volgende profiel voldoen:

Die volgende punte moet in berekening gebring word:

• Die persoon moet oop wees vir die andersheid/uniekheid van die gemeente.
• Die ‘andersheid’ is die kultuur van die gemeente en daarom is dit noodsaaklik dat dit beskerm moet word.
• Die styl en atmosfeer van die eredienste is noodsaaklik. Die ‘Gemeenskapskerk’ se ‘andersheid’ is ‘n vars benadering, maar steeds teologies korrek.
• Die bediening van die sakramente word anders ‘aangebied’. Kleiner kinders vorm deel van die nagmaalbediening en opneem van die offergawes.
• Die bediening aan ‘nie-lidmate’ binne die landgoed, is ‘n unieke benadering.
• Belydenisaflegging word anders hanteer deurdat ‘n kandidaat vanaf Gr 10 kans gegun word om self te besluit wanneer hy/sy gereed is. Gevolglik doen hulle individueel belydenis van geloof dwarsdeur die jaar.
• Die eredienste is geïnspireerd en teologies verantwoord. Die gemeente gebruik nie die PREEKBUNDEL nie. Dit word wel vir eksegese gebruik.
• God voorsien die gemeente jaarliks van ‘n oorhoofse boodskap wat HY in maandelikse boodskappe opbreek. Hiervoor is baie gebed en meditasie nodig.
• Die atmosfeer in die kerk voor die aanvang van die erediens is opvallend. Die vriendelike karakter van die gemeente en die belangrikheid van koinonia verheerlik die Naam van God.
• Aktiwiteite wat in die gemeente aangebied word is uniek. Voorbeelde hiervan is die Manne-aand vir gesinne, die kruistogte gedurende Paasnaweek, die passe-naweek en die werkswyse van die RGL (Raad van Geestelike Leiers) en die funksionering van die bedienings.
• Die RGL beskik oor ‘n Dagbestuur wat byna weekliks vergader en wat alle sake in samewerking met die onderskeie bedienings, spoedeisend afhandel.
• Die Dagbestuur beskik oor ‘n kundige Geestelike Leier wat deurlopend besig is met strategiese beplanning.
• Die besluitnemingsprosesse van die RGL (kerkraad) is kort en effektief.
• Die funksionering is gesond en sterk omdat daar ‘n sterk vertrouensverhouding opgebou is.
• Huisbesoeke is ‘n hoë prioriteit in die gemeente en dit sal ook verwag word van die leraar om sistematiese huisbesoek asook pastorale besoeke aan huis of in die hospitaal te doen.
• Die leraar moet ook nuwe intrekkers so spoedig moontlik besoek.
• Die verskeidenheid van lidmate – vanaf senior burgers tot kleuters – is belangrik. Die leraar sal hom/haar hiervan moet vergewis en verantwoordelikheid hiervoor moet neem.
• Die feit dat die Gemeenskapskerk goeie samewerking met die Bestuur van die landgoed handhaaf, is van uiterste belang vir die voortbestaan van die gemeente.
• Buigsaamheid in die aanpassing van omstandighede is belangrik.
• Dit is belangrik dat die standaard wat in die gemeente gevolg word, so gehandhaaf moet word.
• Die soeke na ‘n leraar sal anders as die gewone daar uitsien.