“Dankie Here vir die nuwe dag.” bid Leon die lammertjie nadat hy opgestaan het. Die môresonnetjie skyn deur sy kamervenster. “U is die goeie Herder, U laat my veilig wei! Blêr!” Leon se ogies is styf toe terwyl hy bid. Toe vra hy vir sy Herder iets wat na aan sy hart is: “Here, wys my vandag hoe ek ander kan help. Ek sukkel daarmee.” Hy loer met sy een oog na die dak om seker te maak dat hy gehoor word. Hy maak sy oë weer toe en eindig sy gebed met ‘n harde “AMEN!” Nou is Leon reg om sy dag te begin.
Leon eet gou klaar, groet sy mamma by die deur met ‘n verspotte druk en roep: “Koebaai maaamaaaa!” terwyl hy by die deur uitstap.
Voordat Leon begin stap, staan hy eers ’n oomblik stil en kyk rondom hom. Hy sien die helder blou lug, die spierwit wolke en die mooi groen bome van Blêrfontein. Hy haal diep asem en asem weer uit. Net toe Leon sy asem uitblaas, hoor hy ’n bekende stem wat sing:“ HY IS JOU HERDER! HY HET JOU LIEF EN HY SAL SORG!”
Dit is tannie Êna wat iemand bedien met haar sang. Leon kyk in die rigting van die sang en sien toe iets wat hy nog nooit gesien het nie: tannie Êna staan met ’n sak oor haar skouer en sy sing vir ’n bok, ’n boemelaarbok, terwyl sy die bok se pootjie vashou.
Leon stap nader om te kyk wat aangaan. Hy het mos gevra dat die Herder hom moet wys hoe om ander te help, so nou kyk hy ekstra mooi na alles. Leon sien dat die boemelaarbok se pote vuil is en terwyl tannie Êna sing, hou sy dit vas met haar skoon poot. Die boemelaarbok se skoene is stukkend, sy klere is vuil en hy sit op koerante. Dit lyk of hy swaarkry, maar tog glimlag hy vir tannie Êna wat vir hom sing.
Nadat sy klaar gesing het, sê sy vir die bok: “Ek het iets vir jou gebring.” Tannie Êna haal ’n paar splinternuwe skoene uit die sak uit en gee dit vir die bok. Sy gee hom ook ’n kospakkie en ’n paar inkopies wat hy nodig het. Hierna glimlag sy vir hom en sê: “Onthou, die Herder het jou lief en hy sal jou help.”
Leon het alles fyn dopgehou. Hy staan verstom. Dis die eerste keer wat hy sien hoe die diere in Blêrfontein mekaar help. Hy raak skoon opgewonde. Hy loer na bo, dink aan sy gebed van daardie oggend en glimlag breed.
Leon voel warm van binne. Hy besef dat die Herder hom reeds wys hoe om om te gee deur vir hom hierdie mooi oomblik te wys. Nou weet hy beter hoe om ander te help, net soos tannie Êna dit doen. Hy groet die bok en stap verder.
Soos Leon stap, sien hy oom Varkie. Oom Varkie is lief vir tuinmaak en is besig om gras te sny. Leon stop in sy spore, want oom Varkie sny nie die gras voor sy eie huis nie – hy is besig om sy buurman se gras te sny! Hy sweet en swoeg, maar hy glimlag breed. Leon verstaan dit nie. Hy besluit om vir oom Varkie hieroor te gaan vra. “Oom Varkie! Môre, oom Varkie!” roep Leon soos wat hy nader stap. “Huh? Grmf!” snork oom Varkie en kyk rond. Hy sit die grassnyer af toe hy vir Leon sien. “Oom Varkie, hoekom sny oom jou buurman se gras?” vra Leon.
Oom Varkie kyk af na Leon en besef hierdie is ’n groter vraag. “Grmf! Ou Leon, ek help maar waar ek kan. Grmf!” snork oom Varkie. “My buurman is ’n besige ou. Hy werk vroeg en kom laat huis toe. Ek dink nie hy kry tyd vir tuinwerk nie. My buurman sal sekerlik gelukkig voel as hy dit sien ná ’n lang dag se werk, grmf!”
Leon is verbaas en hy wil nog weet. “Maar Oom, hoekom doen oom dit? Wil oom dit regtig doen?” Oom Varkie glimlag weer en sê: “Ja, Leon. Ek wil regtig. Dit maak my gelukkig om ander te help. Dis hoe ons almal moet wees. Ons moet omgee en help waar ons kan, want dit maak die Blêrfontein ’n beter plek. Grmf! Kyk, die Herder help ons mos. Daarom wil ons ook ander help. Grmf!”
Leon verstaan nie heeltemal nie, maar hy luister na oom Varkie. Oom Varkie wys toe na die tuin en sê: “Dit is soos om plante te versorg. Grmf! Plante kort mos water om te groei. Dit werk dieselfde: elke keer wanneer jy iemand kan help, is dit soos om vir hulle water te gee. Grmf! Net soos wat jy vir ’n plant sou water gee. Plante wat water kry, groei mooi.”
Oom Varkie glimlag breed en vertel verder: “Party diere is wel soos doringplante wat nie hulp wil hê nie, maar daar is maniere om hulle steeds te help. Grmf!” “Hoe kan ek help, oom Varkie?” vra Leon.
Oom Varkie kyk vir Leon en sê: “Lammertjie, as jy wil help, kyk net bietjie om jou. Daar is oral diere wat hulp nodig het en daar is altyd maniere hoe jy hulle kan help. Wees net bewus. Grmf!”
“Dankie, Oom,” groet Leon en stap verder. Soos wat Leon stap dink hy aan wat hy vandag by sy mede-Blêrfonteiners geleer het. Of jy nou groot is of klein is, wanneer jy vir ander omgee maak jy ’n verskil! Jy moet net vertrou dat die Herder jou sal wys waar jy kan help. Ons moet ook nie net help om iets terug te kry nie – ons moet help omdat ons regtig omgee. Leon het vandag baie gesien en geleer en hy is nou gereed om sy mede-Blêrfonteiners te help.
‘n Projek deur NG Kerk Vrystaat se JONK Vrystaat Netwerk in samewerking met Schink Publishing.
Geskryf, geïllustreer en oudio-opnames deur Martin Schwella, Schink PTY. (ltd.)
Temas en Teologie deur ds Francois Lamprecht, JONK Vrystaat
(“die Kerkmuise“), NG Kerk Vrystaat
Ontwerp deur Celicia McLean en Carlie Niehaus Geset in
www.ngkerkvrystaat.co.za
Alle regte voorbehou. Geen gedeelte van hierdie publikasie mag gereproduseer, gestoor word in ’n herwinningstelsel, of oorgedra word in enige vorm of op enige manier, elektronies, meganies, fotostaat, opgeneem word sonder die skriftelike toestemming van die kopiereghouers en uitgewers nie.
