Nie te ver van hier af nie is daar ‘n dorpie wat bekend staan as Blêrfontein. Dié dorpie is ‘n baie spesiale plek vir een rede: daar woon net diere. Ja, glo dit of nie, dit is ‘n dieredorpie waar almal welkom is.
In die middel van die plaaslande, daar anderkant Stofkop, net voor jy deur die Bossieskraal gaan – daar is Blêrfontein. Alhoewel Blêrfontein ‘n skapedorp is, het daar ook baie ander diere gewoon: beeste, honde, katte, eende, varke en allerhande ander diere. Maar die meeste was skape.
In Blêrfontein het elke dier ‘n rol gespeel en elkeen was belangrik in hul werk. Party diere het strate gevee en ander het skoolgegee. Daar was polisiediere, brandweerdiere en natuurlik dieredokters, of dan dokterdiere.
Elkeen van die gemeenskap het hul deel gedoen. Elkeen het op hul manier gedien en hul bes gedoen om Blêrfontein ‘n besonderse plek te maak.
Daar was ook ouer diere, ou skape en jong lammertjies. As dit skemer word op Blêrfontein, sit die ouer diere graag op hulle voorstoep met ‘n koppie tee – veral die skaaptannies. Die dierekinders het in hierdie tyd lekker buite baljaar totdat dit tyd was om huis toe te gaan.
Ja, Blêrfontein is ‘n mooi dorp met ‘n diere– gemeenskap wat omgee en saamstaan.
Een oggend, nadat daar die vorige nag ‘n reënbui geval het, stap ‘n klein skapie in die straat af. Sy naam is Leon. Leon die lammertjie. Sy pappa het hom winkel toe gestuur om melk en brood te gaan koop. Die winkel is net om die draai, langs die kerk
Terwyl Leon stap kyk hy rond en sien ‘n klomp goed raak. Hy sien die lowergroen bome en die helderblou lug, die mooi huise en netjiese tuine. Hy sien oom Varkie wat besig is om sy struike te snoei, twee ouer tannies wat tee drink op die stoep en oom Basie wat werkskaf in die waenhuis. In die verte sien Leon ‘n hele paar dierekinders wat sport beoefen op die sportvelde. Soos wat hy stap, lig hy sy pootjie om te groet.
“Sjoe, ons straat is pragtig!” dink Leon hardop. ‘n Rukkie later sien Leon die kerk. Hy verkyk hom aan die hoë kerktoring met die hoenderhaan wat bo- op die toring staan.
“Sjoe, dis mooi!” sê Leon hardop. “Hierdie kerk is so – êh … enorm!”
Leon is nog nuut in Blêrfontein. Hy het onlangs saam met sy ouers daarheen getrek. Vandag is die eerste keer wat hy voor die groot kerk in hierdie unieke dorpie staan. Leon het nog altyd daarvan gehou om nuwe dinge te ontdek en dit lyk of daar nog baie is om te ontdek in Blêrfontein.
‘n Projek deur NG Kerk Vrystaat se JONK Vrystaat Netwerk in samewerking met Schink Publishing.
Geskryf, geïllustreer en oudio-opnames deur Martin Schwella, Schink PTY. (ltd.)
Temas en Teologie deur ds Francois Lamprecht, JONK Vrystaat
(“die Kerkmuise“), NG Kerk Vrystaat
Ontwerp deur Celicia McLean en Carlie Niehaus Geset in
www.ngkerkvrystaat.co.za
Alle regte voorbehou. Geen gedeelte van hierdie publikasie mag gereproduseer, gestoor word in ’n herwinningstelsel, of oorgedra word in enige vorm of op enige manier, elektronies, meganies, fotostaat, opgeneem word sonder die skriftelike toestemming van die kopiereghouers en uitgewers nie.
