Ons begin op ‘n Sondagmiddag en vertrek weer teen 12:00 die Donderdagmiddag. Sondagaand is daar ‘n verwelkomings- en inligtingsbyeenkoms, aandete en ‘n meditatiewe (stil) aanbiddingsgeleentheid. Donderdag is daar tyd vir refleksie en heroriëntering, saam eet vir oulaas en afskeid met ‘n aanbiddingservaring.

Die drie vol dae bevat ‘n verskeidenheid van ervarings

‘n Daaglikse pelgrimsroete

Die staptogte se afstande wissel. Op die eerste dag stap ons so 14km. Die Dinsdag se roete is so 13km. Woensdag se roete is twee “trekke”. Die eerste trek so 10km en dit eindig met ‘n goeie etebreek en siësta. Die tweede trek is so 8km en sluit ons pelgrimstap af. Behalwe die asemrowende natuurskoon is daar inspirerende begronding in die plaaslike stories en geskiedenis. Interessante ontmoetings met plaaslike inwoners en unieke roetes wat nie toeganklik is vir die algemene publiek nie.

‘n Geestelike “Pelgrimstog van Hoop”

Deur middel van daaglikse begeleide lees van die Woord, geestelike joernaal skryf, “roetekaarte” wat tydens die stap leiding gee en gebedsvriende wat inhaak vir gesprek en saambid.

Plattelandse gasvryheid

Elkeen bly oor in ‘n plaaslike gastehuis van eie keuse. Die bedoeling is om gemak, rustigheid en privaatheid te ervaar. Letterlik ‘n persoonlike toevlug waar elke reisiger tot verhaal kan kom.

Feesviering

Ons streef daarna dat elke reisiger ‘n volle sintuiglike ervaring van God se goedheid sal ervaar. Daarom eet ons heerlik, kuier met oorgawe en beleef ons al die kultuur, kuns, handwerk en gastronomie wat eie is aan die dorp.

Meditatiewe (stil) aanbidding

Die reisigers neem by twee geleenthede deel aan ‘n aanbiddingservaring wat gebaseer is op die “Taizé”-styl. Ons het ervaar dat dit mense help om diep-geestelike skoffelwerk te doen.

Begronding

Ons probeer so vêr as moontlik die deelnemers vertroud maak met die “grond” waarop ons leef en loop. Plaaslike geskiedenis, stories en mense vorm deel van die kaleidoskoop.

“Sobremesa”

Saam gesels, deel, stories hoor en harte oopmaak in die aande na die aandete.

• Kleredrag na gelang van die seisoen
  (Hou in gedagte dat winters snerpend koud word en dat ‘n warm kledingstuk of twee in die somer nodig kan wees)
• ‘n Dag-stap rugsak
• Skryfgoed
• Lekker gemaklike stapskoene en stapklere
• Sonhoed
• Persoonlike medikasie
• ‘n Wandelstok is aan te beveel
• Sonbril

Die roetes waarop ons stap is oorwegend gemaklik en nie oormatig uitdagend nie. Uit die aard van die omgewing is daar hier en daar stewige opdraendes, maar die roetes is so ontwerp dat daar nie te uitdagende klimme is nie. Om gemaklik deel te neem aan die stap-ervarings, beveel ons aan dat reisigers voorberei om gemaklik 10km te kan stap. Die stap self is teen ‘n gemaklike pas wat genoeg kans gee vir die waardering en belewing van die omgewing. As jy onseker is hoe om voor te berei, kontak ons gerus ‘n paar weke vooraf sodat ons kan leiding gee.