Christus se opdrag aan sy dissipels om die Goeie Boodskap tot aan die uithoeke van die aarde te gaan bring, kom by ’n mens op as jy van Missie Japan hoor. Dis ’n gesamentlike getuienisaksie van die NG Kerk en ander Gereformeerde Kerke in Suid-Afrika, wat in noue vennootskap met die Reformed Church in Japan (RCJ) staan. Hierdie vrywillige geloofsaksie word ondersteun deur individue, groepe, gemeentes en wyer kerkverbande regoor die wêreld.
Dr Nico Mostert, direkteur van Vennote in Getuienis wat hierdie vennootskap bestuur, en ds Johan Winterbach, voorsitter van Missie Japan, was vroeg in November op besoek aan die RCJ en het onder andere tuisgegaan by dr Stéphan van der Watt en sy vrou, Carina. Hulle is ons sendelingpaar wat al sedert 2008 daar betrokke is. Stéphan is by teologiese opleiding by die Kobe Reformed Theological Seminary betrokke en Carina by kinderbediening in hulle plaaslike gemeente.
Nico vertel: “Dit was ’n baie sinvolle besoek en daar is indringende gesprekke met die kerkleierskap van RCJ gevoer. Die eerste gesprek van belang was in Shikoku, een van die eilande waar die werk in die verlede deur Tobie en Annelie de Wet gedoen is en waar Stéphan en Carina ook hulle bediening in Japan begin het.
“Nadat Missie Japan se pogings om weer sendelinge daar te plaas skipbreuk gely het, was daar ’n versoek van die Ring van Shikoku dat die De Wets hulle op ’n interimtydperk van drie jaar weer moet kom uithelp in die dorp Niiama. Dit is egter nie so ’n eenvoudige saak nie en tydens hierdie samesprekings is so ’n moontlikheid ondersoek en oorweeg. Indien dit goedgekeur word, sal daar dan aansoek gedoen moet word om vir die De Wets ’n werkspermit te probeer kry; geen maklike proses nie.”
Net 1% van Japannese is Christene. Japan bestaan geografies uit ‘n verskeidenheid eilande wat dan die land, Japan vorm. In die digter-bevolkte stedelike gebiede is daar ’n redelike verspredinging van gemeentes van die RCJ wat nie die geval is op die ander eilande wat nie so dig bevolk is nie. Die Ring van Shikoku is geleë op een van hierdie eilande en staan bekend as ’n “plattelanse gebied”.
Nico vertel verder: “Die deel in die Ring van Shikoku waar daar groot nood is, is Niiama. Die stadjie is teen die kus geleë en daar is tans nog net vier aktiewe lidmate oor. Die voorstel is dat die De Wets dan daar sal werk en ook die ander gemeentetjies wat in daardie area is, sal bedien.
“Die tweede uitdaging wat bespreek is, is dat daar deesdae ook in Japan nie baie studente vir teologiese opleiding aanmeld nie. Die kerk in Korea stuur wel studente en sendelinge om daar te gaan help, maar dis steeds onvoldoende om al die gemeentes van leraars te voorsien.”
Op Donderdag 10 November het Nico ook ’n kapellesing gelewer oor die werk wat ons as NG Kerk in Afrika doen. Hy het verduidelik hoe ons ons ekumeniese verhoudinge in Afrika met gereelde kontak in stand hou. Die belangrikste hiervan is ons werksaamhede in die Reformed Family Forum, ’n forum wat uit sestien susterskerke in Afrika bestaan wat histories aan die NG Kerk verbonde is.
Nico het ook meer vertel wat NetACT, ’n netwerk van Sub-Sahara Afrika teologiese instellings, doen. Hy het ’n kopie van die laaste twee NetACT-uitgawes, African Public Theology en African Leadership Study, asook ’n kopie van A Family of Reformed Churches in Africa aan die Kobe Reformed Theological Seminary se biblioteek oorhandig.
Die besoek is afgesluit met die oordra van ’n groete-boodskap namens die NG Kerk en Missie Japan tydens die 77ste sitting van die RCJ se Algemene Sinodesitting. Tydens die sinodesitting is daar ook met die RCJ se diakonale kommissie vergader. Hulle dra jaarliks finansieel by tot die diakonale werk van beide die sinodes van die Vrystaat en Wes-Kaapland.
Vir meer inligting oor Missie Japan kan dr Nico Mostert gekontak word by missio@ngkvs.co.za.
