Deur dr Enrico Casaleggio, Vennote in Getuienis
Wanneer jy met Moslems in gesprek tree met die doel om die Evangelie te deel, sal hulle daarop hamer dat die Bybel gekorrupteer is. In die meeste gevalle weet hulle self nie wat hulle daarmee bedoel of op watter manier die Bybel dan nou gekorrupteer sou wees nie. Dit is iets wat hulle (dikwels) iewers gehoor het en as die waarheid aanvaar. Soos reeds genoem, heg ons nie enige geloofswaarde aan die Koran nie. Dit is egter meer as handig om in ‘n evangelisasie-gesprek vir Moslems te wys op wat die Koran oor die Bybel te sê het. Met die lees van die Koran is dit duidelik dat dit juis ruimte laat om die Bybel te lees; Moslems word ook aangemoedig om dit te doen.
Daar is baie verse in die Koran wat die Bybel bevestig en valideer. ‘n Goeie voorbeeld daarvan lui: “O julle wat glo [Moslems], glo in God en Sy boodskapper [Mohammed] en in die Skrif wat Hy aan Sy boodskapper gestuur het en in die Skrif wat Hy voorheen neergestuur het.” (Koran 4:136. Sien ook 29:46, 2:136). Die “Skrif wat Hy voorheen neergestuur het”, verwys na die Bybel. Die Koran beveel Moslems dus om die Bybel te glo en dit behoort so aan Moslems gestel te word met verwysing na hierdie tekste in die Koran.
Die Koran leer dat Mohammed en Moslems die Bybel mag lees en dat hulle selfs aangemoedig word om dit te doen: “As jy [Mohammed] twyfel oor wat Ons aan jou stuur [die Koran], vra diegene (Christene) wat die Skrif (Bybel) voor jou opgesê het.” (Koran 10:94)
In die Koran word Christene boonop gevra om hul bewyse (in teenstelling met wensdenkery) uit hul Skrif te gee. Daar staan byvoorbeeld in Sura 2:111: “En hulle sê: “Niemand sal die Paradys binnegaan nie, behalwe een wat ‘n Jood of ‘n Christen is.” Dit is [bloot] hulle wensdenkery. Sê: “Lewer jou bewyse, as jy waar moet wees.” Hoewel die teks op die oog af nie vir ons sin maak nie, is dit ‘n punt dat Moslems nie kan beweer dat die Bybel korrup is as die Koran Christene juis aanmoedig om dit te gebruik nie. Hierdie verse kan nuttig wees om Moslems daarop te wys dat hulle nie die Bybel kan verwerp nie.
Daar is verskeie teologiese kwessies wat binne die Koran self opgemerk kan word. Dit is plekke waar die Koran bewyse toon van teologie wat nie ooreenstem met tradisionele Islamitiese leerstellings nie.
Om een voorbeeld te gee: In die Koran het God Adam met sy eie hande geskep en toe die lewensasem in hom geblaas (Sura 38:71-75). Op presies dieselfde manier sê die Koran dat Jesus lewe geskep het, naamlik: “Ek [Jesus] het na jou gekom met ‘n teken van jou Here. Ek sal vir jou uit klei die gelykenis van ‘n voël skep; dan sal ek daarin blaas, en dit sal ‘n voël wees, met die toestemming van God.” (Sura 3:49)
Dit is waar dat die storie sê dat Jesus dit net met God se toestemming gedoen het. Dit is egter nie voldoende vir Moslems om Jesus se goddelikheid te ontken nie, want om die skepper te wees is ‘n unieke eienskap van God.
Meer as dit: die verhaal wys daarop dat, volgens die Koran, God ‘n goddelike én ‘n menslike natuur kan hê, soos die Bybel trouens oor Jesus leer. Dit wys dat daar wel ‘n inkarnasie-teologie in die Koran is.
As Christene wil ons graag die evangelie uit die Bybel met Moslems deel. As Moslems egter daarop aandring dat ons die Koran in berekening moet bring, dan kan ons dit ook as ‘n beginpunt vir ons evangelisasie gebruik.
Hierdie reeks Islam-artikels het ’n eiesoortige aanslag. Dit kom uit ’n apologetiese hoek en die reeks sal uiteindelik uitkom by ’n antwoord op verskillende vrae wat Moslems vra, byvoorbeeld oor die Godheid van Jesus. Hierdie artikel handel oor hoe die Koran nie die Bybel verwerp nie, maar eerder aanbeveel.
